Hoeswaark grunneger toal

Wie mozzen t elke moal vannais oetleggen, wie goan noar Grunnen tou .
Alle veuroordailen wuirden herhoald, stugge minsen, saai landschap, proaten onverstoanboar, de communisten binnen nog in Beerte.
Dat gaait nait goud en joe kommen wel weeromme noar de beschoaven tou op joen olle doag as joe verzeurgd worden mouten.
Wie wozzen wel beter, mor oetleggen het gain zin aan Randstedelingen, der is teveul fien mot in dij heufden en zai binnen deuf worden deur aal t verkeerslewaai.
Wie gingen op zuik in Grunnen, keuzes moaken, under of boven de A 7, klaai of zaand.
Wie lusterden noar de minsen en haren de provincie deur veule raaizen kennen leerd.
Veul hoezen van boeten en van binnen zain en der was altied wat mis mit, boktor, te ainzoam, te groot, te klaain, noast n schoule, onmis oetzicht, windmeulen in achtertoene.
De moakeloar was liedzoam.
Sikkom elk weekende gingen wie van Zoetermeer noar Vlagtwedde tou op zuik noar ons dreumhoes.
Mien vraauw dee de veurselectie via Funda, k leverde kretiek en as wie t ains waren kwam t hoes in de map "mogelijk huis" veur ons.
k Keek altied noar t adres en alle hoezen mit n adres Hoofdweg, Rijkstraatweg of tiepische nijboawnoamen mietern bie veurboat of, wie zuiken vree en gain verkeer veur d’deure.
Elke keer as wie in provincie waren vuilden wie ons welkom, en t Westerwolde as woonstee wuir almoal aantrekkelieker.
Ons stee in Zoetermeer was verkocht worden en mien vraauw wuir wummelg, 1(ain) september, 2004 (twijdoezendvaier) waren wie dakloos tenzij wie wat passends kregen.
Noa de zoveulste mislukte hoesbezichten wui t ideoale hoes vonden, n pension in Wedde, aan de Hoofdweg mit ANWB poale as oetzicht vanoet de woonkoamer. t Kin verkeren.
Vrijdoag 13 (dattien) augustus, 2004(twijdoezendvaier) wuirden wie aigender.
De oannemer begon op 15 (vieftien) augustus mit de sloop- en verbaauwwaark.
t Eerste woord wat wie leerden was moi, wie gingen toun "moiend" deur t dorp.
t Twijde woord wat wie leerden was kouke.
t Weerbericht in Grunneger toal was onbegriepelek mor t weer konden wie toch nait verandern.
t Pension wuird verbaauwd en k kreeg de luukse van n aigen rookkoamer, nou kon k ongehinderd piepken en dagdreumen over de toukomst mit mien vraauw.
Veul vrunden en femilie ontvangen, zai kwammen geern veur n poar doagen.
Wie traktaaireden heur altied op n fietstochtje in d’ omgeven.
n Ontdekkensraaize in t onbekende. Noamen als Smeerling, Harpel, Höfte, Laude, Kopstukken, Jipsingbourtange waren nij veur heur.
De veuroordailen waren in ainmoal veurbie, wat is t hier mooi en gruin en hailemoal nait zo vlak as wie docht haren. t Is t best bewoarde gehaaim van Westerwolde.
As toetje kuierden wie noar Burcht tou en weer verboazen, nait waiten dat der n Burcht in Wedde was.
Onze vrunden en wie genottern. Zai begonnen te begriepen woarom wie t westen ontvlucht waren, en zai begonnen hun oardail over Grunnen te veraandern.
t Was toch nait zo wied as zai docht haren en zai kwammen beslist weerom.
Veur de veziede weer vertrok eerst even bie dorpswinkel langs, kouke en vrizze worst kopen.
Onbekende lekkernijen en nait te koop in t westen.
Zo druigen wie ons staintje bie aan Grunneger promotie.
Mien vraauw was lid worden van plattelaandsvraauwenverain en kwam altied mit nije woorden terugge, zai leerde mie Grunneger woorden.
Zo vruig zai mie:" waist doe wat n houdje is", en noatuurlek zee k dat is n stuk holt. Fout.
Zo ging t veule moalen.
Tegen t inde van t joar begon t carbid schaiten en doar verboasde k mien vrunden in t westen mit.
Zai doun hier aan carbid "schijten" in Blijham.
Dat was de Grunneger oetsproak en veur n westerling klonk dat veur de Blijhammers as n zeer pienleke ervoaren. k Wait nou wel beter.
Wie haren der veul om lacht en 2004 (twijdoezendvaier) was veur ons n onvergetelik joar.
Wie vuilden ons thoes in Wedde en wilden nait meer vot en zagen de toukomst vol vertraauwen tegemuidet.
Ons hoes mos n noam kriegen en wie kozen veur "Swerwersrus", de struner oet Zuud Afrika haar endelk rust vonden in Wedde.
Nou woon k allain in "Swerwersrus".
Mien vraauw overlee onverdachts, toun heb k de Weddenoaren kennen leerd, zai leefden mit mie mit en k woardeer de betrokkenhaid nog altied.
Mien laivelingslaid is n laid van Klaas Spekken "Twij Olle Minsen" De lette 2 (twij) reegels van t refrain binnen mien credo.
"Het gaait beter keer op keer, en op zien tied zugt hai heur weer".